सगरमाथा आरोहणमा प्रतिकूल मौसमको असर | Sajha Khabar

सगरमाथा आरोहणमा प्रतिकूल मौसमको असर

Mt Everest

हाल वसन्त ऋतुमा सगरमाथासहितका विभिन्न हिमालहरूको आरोहण भइरहेको छ। तर, तीव्र हावाहुरीका कारण सगरमाथा र कञ्चनजङ्घा लगायतका हिमालहरूमा आजको आरोहण रोकिएको छ। पर्यटन विभागका अनुसार मौसम प्रतिकूल भएका कारण धेरै आरोहीहरू सुरक्षित स्थलमा फर्किरहेका छन् भने केही आरोही दोस्रो र तेस्रो शिविरमा मौसम सुध्रिने प्रतीक्षामा छन्।

सगरमाथाको आधार शिविरमा रहेका विभागका प्रतिनिधिका अनुसार मे १५ तारिखको आरोहण योजना रद्द भएको छ, र मे १४ को योजना पनि रद्द हुने सम्भावना छ। मौसम अझै केही दिन सुधार नहुने अनुमान गरिएको छ। यदि मौसमले साथ दियो भने मे १८ देखि फेरि आरोहण सुरु हुने सम्भावना विभागले जनाएको छ।

हालसम्म चार आरोहण टोलीले मात्र सगरमाथाको चुचुरोमा पुग्न सफल भएका छन्। केही आरोहीले लोहोत्से र मकालु हिमाल पनि सफलतापूर्वक चढेका छन्।

यो सिजनमा सगरमाथालगायत २६ वटा हिमाल चढ्न १,१२७ जनाले अनुमति लिएका छन्, जसमध्ये ४५ वटा टोली सगरमाथाका लागि छन्। खराब मौसमले गर्दा आरोहण प्रभावित भए पनि अनुकूल समय पर्खेर आरोहीहरू प्रयासरत छन्।

Post a Comment

0 Comments